ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហាញការបារម្ភនិងឱ្យក្មួយៗតាមដានស្ថានភាពរបស់បងប្រុសទី១ របស់សម្ដេចគឺលោក ហ៊ុន សាន បន្ទាប់ពីសម្ដេចណែនាំឱ្យប្អូននិងក្មួយយកដំណឹងពីមរណភាពសម្ដេចទេពញាណ ហ៊ុន ណេង ដល់គាត់។

សម្ដេចតេជោ ហ៊ុន សែន បានសរសេរនៅលើហ្វេសបុកផេករបស់សម្ដេចថា ក្រោយពីទទួលដំណឹងពីមរណភាពរបស់សម្ដេចទេពញាណ ហ៊ុន ណេង លោក ហ៊ុន សាន មានភាពស្រឡាំង ញ័រដៃ ភ្នែកក្រហម និងពោលពាក្យដដែលៗថា «ហេតុអីមិនប្រាប់គាត់»។

សម្ដេចតេជោបន្ថែមថា៖ «ក្រោយការពន្យល់របស់ប្អូនៗនិងក្មួយៗគាត់យល់តែអ្វីដែលបារម្មណ៍គឺក្រោយពេលប្អូនៗនិងក្មួយៗចេញផុតមកគាត់អង្គុយយំនិងពិសារគុយទាវតែ២ម៉ាត់គត់។ គាត់បាននិយាយថាប្អូនគាត់មិនមានជម្ងឺអ្វីសោះនិងបន្តនិយាយថាហេតុអីមិនប្រាប់គាត់។ ខ្ញុំកំពុងឱ្យក្មួយៗតាមដាននិងលួចថតរូបគាត់ផ្ញើមកខ្ញុំ។ គាត់ពិតជាពិបាកទទួលយកនូវរឿងបែបនេះណាស់ព្រោះនេះជាការវាយប្រហារខាងផ្លូវចិត្តខ្លាំងបំផុតសម្រាប់គាត់»។

គួរឱ្យដឹងផងដែរថា បងប្រុសទី២ របស់សម្ដេចតេជោ គឺសម្ដេចទេពញាណ ហ៊ុន ណេង បានទទួលមរណភាពក្នុងជន្មាយុ ៧២ឆ្នាំ កាលពីល្ងាចម៉ោងប្រមាណ ៦និង២៥នាទី ថ្ងៃទី៥ ខែឧសភា ឆ្នាំ២០២២នេះ ដោយសារជំងឺគាំងបេះដូង។ ក្រុមគ្រួសារមិនបានជម្រាបដំណឹងដល់លោក ហ៊ុន សាន នៅឡើយទេនៅពេលនោះដោយបារម្ភពីសុខភាពរបស់លោកដោយសារលោកត្រូវចូលមន្ទីរពេទ្យវះកាត់នៅប្រទេសថៃ៕